Kömpt iimes wat fruch, daan es`e ene Lästige
Kömpt iimes wat laat, daan es`e ene Plaarsak
       Schpräkt iimes wat wenich, daan es`e ene Schtuere
       Schpräkt iimes wat mier, daan es`e ene Kwaaksak
Et ene wat wenich, daan es`e ene Püemel
Et ene wat mier, daan es`e ene Freatsak
       Drengkt ene ni füel, daan es`e ene Drööge
       On drengkt ene wat mier, daan es`e ene Suupsak

Kikt ene dök na de Froli, es hään ene schärpen Haan
Kikt ene wat weniger…………wat maach met dään wäl siin?
       Es ene wat fain aangetroke, daan es`e ene Schtrontsbüül
       Es`e ni sue fain, daan es`e en Halfgehangk
Es iimes wat gruet, daan es`e ene langen Därm
Es ene wat klender, daan es`e ene Mälmpüüper
       Es ene wat lebändich, daan ploocht ööm de Wälmuut
       Es ene wat saachskes, daan es hään ene Schüetige

Süüt en Den uut wi ene Filmschtaar, daan es et en Flitsche
Süüt se ni sue uut, daan es et en Härskat
       Kikt se na de Jonges, daan es se läch wi Flöötenholt
       Kikt se ni na de Jonges, daan es se en Jöferke
Es en Den achter wat briet, daan es se en Pospeert
Es se wat schmaal, daan es se ene magere Geet
       Laacht en Den wat füel,daan es se en Laachduf
       Laacht se wat säldener, daan es se en eege Prümke

Ärbait ene wat senich, daan es hään ene Fulek
Wirkt ene wat härt, daan es`e ene Wööles
       Es ene Jong wat kibich, daan es`e enen Härshaan
       Es`e ni sue kibich, daan es`e enen Troenbüül
On geft ene wat füel uut, es hään ene Weentbüül
On helt`e sin Grosches beien, es`e en Gitspät.

Do mos fan alemoel wat häbe, daan bes`e enen ächte Fochdaier!